Nýlega boðaðar breytingartillögur innviðaráðherra á lögum um lögheimili og aðsetur valda svo ekki sé meira sagt miklum vonbrigðum. Í frumvarpinu virðist ekkert tillit vera tekið til þeirra ábendinga sem komið hafa fram frá Búsetufrelsi um áhyggjur þeirra af skilgreiningunni „Ótilgreint í húsi“ sem er leyfð hjá Þjóðskrá en farið að túlka sem ólöglega búsetu m.a. af hálfu frumvarpshöfunda.
Innviðaráðherra er vel kunnugt um þann gríðarlega fjölda frístundahúsa í Grímsnes- & Grafningshreppi og erindi Búsetufrelsis til sveitarstjórnar um að koma að lausn þess vanda sem fólk upplifir sem velur að vera íbúar í Grímsnes- & Grafningshreppi og greiðir skatta sína og skyldur til sveitarfélagsins sem löglegir íbúar. Í nýlegri skýrslu ráðuneytisins kemur fram að rúmlega 1/5 hluti allra frístundahúsa á landinu er að finna í þessu sveitarfélagi.
Fjöldi fólks býr í frístundahúsi sínu allt árið um kring án skráningar í hreppnum. Það frestar sölu íbúða sinna á höfuðborgarsvæðinu von úr viti til að geta skráð lögheimili sitt einhvers staðar.
Búsetufrelsi hefur ítrekað bent á alla þá þætti er lúta að öryggi fólks, réttindum fólks og ókostunum við það eitt að búa þar sem enginn veit hvar það er. Það eru mannréttindi að fá að búa þar sem heimili manns er en mannréttindabrot að vera gert að greiða sömu skatta og skyldur eins og um íbúðarhús væri að ræða og fá ekki það sama fyrir.
Það er mat stjórnar Búsetufrelsins að ráðamenn geti ekki hunsað þá búsetubreytingu sem hefur orðið hér á landi á síðustu árum, enda fyrirmyndir að slíkri búsetu að finna um allan heim.
Búsetufrelsi skorar á innviðaráðherra að bæta réttindi fólks sem velur þetta búsetuform um leið og farið er í lagfæringar á sömu löggjöf vegna aukinna brunavarna.